უკრაინელი ლტოლვილი, 23 წლის ირინა ზარუცკაია აშშ-ში, მეტროში მგზავრობისას სასტიკად მოკლეს.
გოგონა მგზავრობდა, როდესაც მის უკან მჯდომმა მამაკაცმა მოულოდნელად ბასრი საგანი ამოიღო და ყელის არეში დაჭრა. შემთხვევა გასულ თვეს, ჩრდილოეთ კაროლინის ქალაქ შარლოტში მოხდა.
სათვალთვალო კამერით გადაღებული, სასტიკი მკვლელობის ამსახველი კადრები სოციალურ ქსელში ვრცელდება.
მკვლელი 34 წლის დეკარლოს ბრაუნ უმცროსია. როგორც მოგვიანებით გაირკვა ის მანამდე 14-ჯერ იყო ნასამართლევი სხვადასხვა ძალადობრივ დანაშაულებში მონაწილეობისთვის. თუმცა, საპატიმროს გირავნობის გადახდის შემდეგ ტოვებდა.
ასევე ვრცელდება ინფორმაცია, რომ ბრაუნი შიზოფრენიით იტანჯებოდა.
- მოკლული უკრაინელი ლტოლვილის ოჯახის წევრები სამართალს ითხოვენ.
„სიტყვებით ვერ გადმოვცემთ იმას, რაც ჩვენს გულებში ხდება. ირინა აშშ-ში ომს გაექცა და უსაფრთხოების საძიებლად ჩავიდა. ამის ნაცვლად, მას სიცოცხლე ყველაზე საშინელი გზით წაართვეს.
არცერთ ოჯახს არ უნდა მოუწიოს ამის გავლა,“ – ნათქვამია ოჯახის მიერ გავრცელებულ განცხადებაში.
- საზარელ შემთხვევას გამოეხმაურა აშშ-ის პრეზიდენტი, დონალდ ტრამპიც. მისი თქმით, კრიმინალის ზრდაში დამნაშავე დემოკრატების ლოიალური მიდგომები იყო.
„მე ვნახე საშინელი ვიდეო ლამაზი ახალგაზრდა უკრაინელი ლტოლვილისა, რომელიც ამერიკაში უკრაინაში მიმდინარე საშინელი ომისგან თავის დასაღწევად ჩავიდა. ის ჩრდილოეთ კაროლინას შტატის შარლოტის მეტროთი მგზავრობდა, როდესაც ფსიქიკურად დაავადებული შეშლილი სასტიკად დაესხა თავს.
დამნაშავე ცნობილი კრიმინალი იყო, რომელიც იანვარში სულ 14-ჯერ დააკავეს და უნაღდო გირაოთი გაათავისუფლეს. რას ჯანდაბას აკეთებდა ის მატარებელში და რატომ დადიოდა ქუჩებში? ასეთი დამნაშავეები უნდა დააპატიმრონ.
ამ უდანაშაულო ქალის სისხლი წვეთავს მკვლელის დანიდან და ახლა ამ სისხლით დემოკრატების ხელებია ამოთხვრილი, რომლებიც უარს ამბობენ ცუდი ადამიანების ციხეში ჩასმაზე. ჩრდილოეთ კაროლინას, როგორც ყველა შტატს, სჭირდება კანონი და წესრიგი და მხოლოდ რესპუბლიკელების მიერ იქნება ეს უზრუნველყოფილი!
სად არის მეინსტრიმული მედიის აღშფოთება ამ საშინელი ტრაგედიის გამო?“, – წერს პრეზიდენტი ტრამპი.